Құлсары төрінде көктем келісімен жаңа балабақша қолданысқа берілді. Мемлекет қаржысына емес, меценат қаржысына бой көтерген. 165 құлсарылық кішкентайлардың білім, тәрбие алуына бар жағдай жасалған. Заманауи техника, сәнді жихазбен жабдықталған. Мұнтаздай таза, әдемі әрленген ғимарат. Іргетасынан бастап, әрбір қаланған кірпішіне дейін, коммуникациялық желілерінің тартылуы да Мағауияның тікелей қадағалауымен жүзеге асты. Себебі бұл кәсіпкер үшін кезекті құрылыс нысаны емес. Бұл оның балалық шағында анасына берген уәдесі. Мағауияның анасы балабақшадағы тәрбиешілік қызметке өмірін арнаған адам. Анасының өз кәсібіне деген махаббатын бала жүрек сезсе керек: “Ер жеткенде мен саған балабақша салып беремін”,-деп кішкентай Мағауия сөз береді. Арада жылдар өтті, анасы күнделікті тірлікпен бұл айтылған “арманды” ұмыта да бастады. Алайда Мағауия “ер екі сөйлемейтінін” құлағына құйып өскен бала. Сондықтан берген уәдесі ұдайы оның жадында болды. Тек жадында ғана емес, ол осы ойын жүзеге асыруды мақсат қылып қойды. Орындады. Мағауия жарады!!!