«Қазақстан 2050» Жалпыұлттық қозғалысы Жеңістің 70 жылдығы қарсаңында #Zhenys70 онлайн фотоакциясын жариялады. Қозғалыс белсенділері, республикалық акция арқылы соғыс жылдарындағы қазақстан халқының ерлігіне тағзым етіп, майданда және тылда жанкештілік көрсеткен ардагерлерге деген сыйластық сезімін білдіріп, өскелең ұрпақ бойында еліміздің бейбіт өмірі үшін азаматтық жауапкершілігін нығайтуды көздеген болатын.

    «Соғыс мыңдаған отбасылардың өмірін ойсыратып кетті. Еліміздің әрбір шаңырағы, әрбір көшесі соғыс тарихынан сыр шертеді десек артық айтқандық емес. Кей ардагерлер майданда қан кешсе, кейбірі тылда тынымсыз еңбек етіп, жеңіс күнін жақындатып, ерлік көрсетті. Соғыс тарихы айналамызда, біз де соның бір бөлігіміз. Ендеше барлығыңыздан соғыс жылдарындағы зұлмат уақыттан сыр шертетін, отбасылық альбомыңыздағы көне суреттерді жариялауыңызды сұраймыз. Олар міндетті түрде ардагерлердің суреттері болуы шарт емес. Сол заманның тынысын бейнелейтін кез-келген сурет болса болғаны, - дейді «Қазақстан 2050» Жалпыұлттық қозғалысының медиадиректоры Қанат Әуесбай.